I/e nderuar vizitor/e,

Ju falënderojmë që zgjodhët faqen e Trustit për të shpenzuar një pjesë të kohës suaj.

Trusti i Kursimeve Pensionale të Kosovës (Trusti) është institucion i themeluar në gusht të vitit 2002 për të administruar dhe menaxhuar kontributet e obligueshme pensionale (dhe vullnetare) të të punësuarëve në Kosovë.

Trusti është i angazhuar kryesisht për mbajtjen e kontributeve pensionale të kursyera nga qytetarët e Kosovës gjatë marrëdhënies së punës, të cilat ruhen nëpër llogari individuale të kontribuuesit. Administrimi i këtyre llogarive individuale është përgjegjësi ligjore e Trustit, përderisa paratë mbesin pronë vetanake e kontribuuesit.  Edhe pse pronë private, mandati i këtyre kursimeve është specifik – ato mund të përdoren vetëm për pension.

Sa janë nën menaxhimin tonë, mjetet investohen sipas parimeve të investimeve të kujdesshme të paracaktuara me ligj. Investimet bëhen në mënyrë që kursimtarët kosovarë, në afate të gjata të kenë rritje sa më të madhe të llogarisë, ashtu që t’iu sigurohet një pension sa më i mirë me rastin e pensionimit. Investimet e Trustit janë të bëra në klasa të aseteve, tregje botërore dhe industri nga më të ndryshmet, në mënyrë që të shpërndahet dhe kështu zvogëlohet rreziku i mundshëm që vjen nga investimet.

Faqja jonë në internet është pasqyrë e plotë 'virtuale' e asaj çfarë bënëTrusti. Këtu do t’i gjeni përgjigjet në pyetjet rreth punës së Trustit dhe menaxhimit të mjeteve. Nëse keni pyetje për të ciilën nuk e gjeni përgjigjen, atëherë ju lutem na kontaktoni.

Me nderime,

Menaxhmenti i Trustit

Trustorja

Prishtinë, 16 gusht 2010 - Trustorja është buletini i përtremuajshëm i Trustit. Buletinin e tremujorit të II të vitit 2010 mund ta lexoni këtu.

Në korrik Trusti merr rritje të vlerës investuese për 11,5 milionë euro

Prishtinë, 17 gusht 2010 - Trusti i Kursimeve Pensionale të Kosovës ka pranuar raportet zyrtare përfundimtare nga menaxhuesit e mjeteve për muajin korrik 2010. Këto raporte tregojnë për një performancë mjaft pozitive të investimeve të Trusti-t për këtë periudhë, me një rritje të vlerës së aksioneve prej 2.74 për qind apo, në vlerë monetare, një rritje prej rreth 11,5 milionë euro, pa përfshirë taksën menaxhuese. 

Ky kthim pozitiv e ka rritur çmimin e aksioneve të Trusti-t në 0.98 euro nga rreth 0.95 euro që ishte në fund të muajit qershor. Kjo rritje e vlerës së mjeteve të Trusti-t ka bërë që të ngrihet edhe vlera e mjeteve në menaxhim në mbi 427 milionë euro.

Rritja e vlerës së kthimit nga investimet e Trusti-t në tregjet financiare përmes asetmenaxherëve, ka ardhur drejtpërdrejt nga përmirësimi i tregut të aksioneve dhe i tregjeve financiare në përgjithësi. Shkaqet për këtë përmirësim erdhën nga ulja e rrezikut të krizës së borxheve në disa vende të Bashkimit Evropian, çka solli edhe kthimin e besimit në monedhën Euro. Gjithashtu përmirësimi i dukshëm i eksporteve gjermane i dha mjaft shtytje rritjes ekonomike të BE-së. Ndërsa në SHBA, përveç se u arrit të ndërpritet derdhja e naftës në Gjirin e Meksikës, pati rritje të numrit të të punësuarve, edhe pse jo në nivelet e pritura.

Sidoqoftë, edhe pse edhe vitin 2010 tregjet financiare nuk e kanë fituar ende një stabilitet të qëndrueshëm, të dhënat tregojnë se tregjet financiare, deri në fund të gjysmës së parë të 2010-s, kanë qenë me më pak oscilime se sa në vitet 2008 dhe 2009.

Bordi i Trustit investon edhe 59 milionë euro

Bordi Udhëheqës në mbledhjen e fundit ka vendosur që t’i plasojë edhe 59 milionë euro shtesë nëpër menaxhuesit aktual të mjeteve. Gjithnjë sipas parimeve të investimeve të hartuara dhe miratuara nga Bordi në mbledhjen e kaluar, është vendosur që të investohen 10 milionë euro shtesë në tregun e aksioneve, përmes menaxhuesit të mjeteve Vanguard. Ky vendim është marrë konform stabilitetit në rritje të tregjeve ndërkombëtare financiare si dhe rezultateve të kënaqshme të cilat i kanë arritur investimet e Trustit gjatë tremujorit të parë këtij viti.

Pasqyrat 2009

Trusti ka përfunduar shtypjen e afro 300,000 pasqyrave për periudhën 2009. Këto pasqyra tanimë janë duke u shpërndarë përmes postës tek adresat fizike të kontribuesve. Deri në fund të këtij muaji do të përfundohet shpërndarja e tyre. Kontribuesit që nuk pranojnë pasqyrën në adresën e tyre, mund të thërrasin në Trust për të përmirësuar adresën apo për të krijuar qasje përmes internetit në llogarinë e tyre.

Materialet filmike

Në këtë lidhje mund t’i shihni materialet filmike të prodhuara nga Trustit që kanë për qëllim informimin e drejt të kontribuesve për Trustin dhe sistemin pensional.